So, au em Eikaufa!
s Geld forttraga

I han jo scho erwähnt, daß mr bei ons em Ländle ällaweil fir älles a Rechtfertigung braucht, denn dr Nochbor isch neigierig, "wonderfitzig" wie nomol ebbes. Ond was uff dr Nochbor zutrifft, des gilt au für da Chef, fir d Kollega, Verwandte ond eigendlich dr ganz Flecka ond älles dromrom.

Also braucht mr sich do gar koine Illusiona macha, wemmr d' Hütte verlässt, om äbbes anders zom doand als zom schaffa, no sott mr schau a guads Alibi d'fier han!

Em Sonndichs isch des vielleicht jo grad no gsellschaftlich akzeptiert, wenn mr en dr Gegend romschwanzt, a Schbaziergängle macht, oder amol noch am Feierobed om d vier Ecka, mr will ja bloß amol "noch am Reachta gucka".

Etzt ischas hait jo so, daß de ällermaischte Leit koine Selbschtversorger mai send, also z'mindescht et honderprozentig. I moin, ma geit sich jo redlich Miah mit em Gärtle ond sät ond pflanzt, was dr Boda hergeit ond isst, was d' Schnecka ond s ander Ooziefer oim iebriglasset, aber i moi, mr will jo au amol wieder a Floisch ond vielleicht a baar Bombola oder Keks, dr nächste Geburtstag kommt jo au wiedr, ond für da Kuacha muaß au 's Mehl her, d'Oier falled vom Hemmel ond ufm Abort will mr sich jo au nemme grad mit Zeitungsbabier bhelfa miassa. Obwohl der Dreck, der do denna schdohd, jo ällamol grad reacht war, zom sich mit da A...

zehmagfaßt uff oin Nenner: Eikauft muaß amol wiedr werra.

Dr Zeadel an dr Kuchawood hanget jo au schau wiedr bis faschd uff dr Boda naa! Em Morgneds schnell no dr Maa gfragt, bevor 'r ins Gschäfd goht, ob er ed au no was briicht, ausm Baumarkt, der isch jo glei oms Eck nom vom Subbrmarkt aus, d'Oma wird au oogrufa, damit se ihrn Wonschzeadel durchgee koo.

Dia ganze Eikaufskrätta wärret älle diskret en dr Garasch glagret, denn d' Nochbore, die grad amol wiedr verdächtig lang braucht zom ihre Betta auszomschiddla, braucht jo ed wissa, daß ma schau wiedr ens Eikaufa fährt, mr war jo letzt Woch airschd.

Also ko's losgau!

Am maischde regt mr sich drieber uff, daß der Lada etzt schau em Achte uffmacht...em Neine hot's jo ällamol no dau, ond etzt isch dr Parkplatz gegenieber dr Diar schau wiedr blegt, garantiert an Dauerparker! Der alte Göppel isch doch letzschd Woch schau dohanda gschdanda. Der ghairt au amol aagschleppt.

No khet mr sich schau grad wiedr selbr dachtla: Naiderlich hot ma vor lauter Lass-me-au-mit s Leergut d'hoim schdanda lau! Egal, nächsch mol isch au amol, ma ko jo ed an älles denka, oddr!

Also nai en den Konsumtempel, vornedurch gohts ällaweil no schnell, denn dean ganze Lombogruuschd us dr Werbung braucht no au in drei Gottes Noama wirklich koi Sau et! Obwohl, so an Wassermaxx der wär jo doch eigentlich ganz gschickt, den hot doch d Gabi au airscht daletztscht kaift, ond was hot dui gsait, häb der koscht, achzg Eiro, ha do schdohd r fir 50! Ha, desch doch a Schnäpple, do wär ma jo schee bleed...ond a Gschenk fir da Neffa briecht mr jo au no...also mol kurz durch dia DVDs gschdöbret.

Weil ma koi Ohnung hot von dem Scheiß kauft mr eh garantiert de Falsch, aber no soll er's halt omtauscha, oder ed! Dr guade Wille zählt jo!

Also des hot jetzt wiedr gar ed lang dauret, ond der Vorsatz, desmol au gwieß nix anders en da Waga zom lega, als ufm Zeadel schdohd, hot sich wiedr verflichtigt!

Vorm Tchibo-Regal, do schdohd au no oine, ha dui kennsch doch, hajo,. aus dr

s folgt naiderlich dui Schdandard-Subbrmarktbegrießung, daß dui no ed im Duda schdohd, wondred mi jo schau! "Au em Eikaufa!".

Em Eikaufa! Sodd mrs fir meglich halta. Eigentlich soddsch amol saga: "Ha, mo denksch au no! I gang do bloß schbaziera, weil mir dui Musik so gfällt"...aber wenn de ed grad Hardcore-Eros Ramazotti- und Phil Collins-Fan bisch, wirkt des nadierlich wenig glaubhaft.

Also, "Au em eikaufa!!", des isch koi Frog, des wird mit Ausrufezeicha gschwätzt. Weil eigentlich ischs jo zwoierloi... aber gwieß koi Frog ed! Zom oina ischs an Vorwurf. Scho wiedr em Eikaufa! Nix z'dond, nar, no treibsch de halt em Lada rom...s Geld forttraga...aber zom andra fiehlt mr sich jo ertappt, weil mr selber jo au ed besser isch...und isch no wiedr froh, daß es de andre au ed andersch goht.

Also wird no halt erschd amol an dem Tchibo-Depot romgschdeberet, ob do ed wiedr "ebbes gschickts" dabei ischd.

Zehma machts grad nomol soviel Schbass! Des hen dia Konsumforscher von dera Kaffeeröschderei scho verdammt gschickt uffzoga! Dia hend sich glaub mit dene weibliche Triebe, die sich leichter verlocked lassed, als es emmer zuagebba wird, schau verdammt guat analysiert und nutzed des schamlos aus!

Als Mo denksch dr do machmal, oh lass fatza! Abr hälenga dädsch jo ällomol selber ganz gern uff dui Art "em Eikaufa" dr Dag verlottra. Fir d männliche Artgenossa isch des nadierlich airscht recht ed gsellschaftlich akzeptiert. Wenn de do amol ondr dr Woch vor Faife obends durch so n Supprmarkt schdriahlschd, odr no schlemmer, durch a Drogerie oder gar durch d'City, no guecked se de oa wie n Eidrengling! Was will DER Kerle jetzt au do, hot der koi Gschäfd...oder no schlemmer...ko der sich koin Urlaub mai laischda und muaß jetzt d Feria d'hoim verbrenga ond en dr Schdadt romlongera!

Noi, gsellschaftlich akzeptiert isch dui Eikauferei no grad em Samschdichs, wenn de no mit dr ganza Sippschaft losziagscht. Sodde Fäll geits jo au. I han amol a Familie kennt khedd, die hänn des generalstabsmässig durchorganisiert. Do henn älle mitmiassa, dia grad do wared, egal was se grad gmachd hend. Wenn d Mamma dr Rappel packt hot, no isch s Kommando losganga ond älle ins Auto gschtiega. Ond em Lada drenna senn die no älle uffteilt worra, dr oine an d Wurschd, dr ander zom Käs, d Tochter, die bloß z Bsuach do war, zom Gmias nom...ond d Cheffe hot freie Boh ghed, weil se do jo au wiedr a baar Leid troffo hot....ihr wisssed schau, des vermaledeite Tchibo-Regal...

So isch des nadierlich au a Sach! Vor allem hot des dr beträchtliche Vorteil, daß koinr dr andre zor Sau macha ko, weil ers falsche brocht oder wiedr s wichtigschd ganz vergessa hot.



Arrohschiert hot mr sich als Schwob jo mittlerweile wunderbar mit dene EC-Karta! Isch halt schau besser, wemmer ed grad so mitoofiahla muaß, wia oim des Geld zo de Fenger nausrennt. Ond der henter mir muaß jo au ed seha, was dees wieder koschd hot.